• ضرورت آمادگی برای مقابله با حملات تروریست ها از افغانستان به تاجیکستان

سفیر روسیه در تاجیکستان بر ضرورت آمادگی برای مقابله با حملات گروه های تروریستی از افغانستان به این کشور، تاکید کرد.

به گزارش اسپوتنیک، «ایگور لیاکین فرال اف» در آغاز رزمایش مشترک نظامی نیروهای واکنش سریع سازمان پیمان امنیت جمعی در تاجیکستان، بر احتمال وجود خطر حملات گروه های تروریستی از افغانستان به تاجیکستان هشدار داد.  

وی تاکید کرده است، اخیرا در افغانستان گروه طالبان حملات خود را تشدید کرده است و گروه تکفیری داعش نیز به ناامنی در نزدیکی مرزهای شمال افغانستان با تاجیکستان و دیگر کشورهای آسیای مرکزی دامن می زند.

سفیر روسیه در تاجیکستان معتقد است، هرچند احتمال تجاوز مستقیم گروه های تروریستی مستقر در شمال افغانستان به تاجیکستان بعید است اما سه تا چهار هزار نفر از اعضای داعش از سوریه و مناطق دیگر به افغانستان منتقل شده اند که در بلند مدت خطرات حملات این جنگجویان به تاجیکستان، باید جدی گرفته شود.

به گفته وی رزمایش مشترک نیروهای واکنش سریع سازمان پیمان امنیت جمعی در تاجیکستان و در نزدیکی مرزهای این کشور با افغانستان، نمایش قدرت این سازمان در برابر هرنوع حملات احتمالی گروه های تروریستی خواهد بود.

رزمایش مشترک نظامی نیروهای واکنش سریع سازمان پیمان امنیت جمعی روز گذشته در ولایت ختلان و در نزدیکی مرز تاجیکستان با افغانستان آغاز شد.

این رزمایش با حضور واحدهای زمینی، هوای، زرهی و توپخانه از ارمنستان، بلاروس، قزاقستان، قرقیزستان، روسیه و تاجیکستان، به مدت 10 روز ادامه دارد.

24 عقرب 1396, 10:08 کابل
Comments