• Manjo Janar Yahaya Rahim Safawi Ya Ce: Zanga-Zangar Al'ummar Iran Sako Ne Ga Duniya

Mai bada shawara ga Jagoran Juyin Juya Halin Musulunci na Iran kan harkokin tsaro ya bayyana zanga-zangar da al'ummar Iran suka gudanar domin zagayowar cikan shekaru 39 da samun nasarar juyin juya halin Musulunci a Iran da cewa; wani babban sako ne ga makiya Iran.

A zantawarsa da manema labarai a lokacin gudanar da zanga-zangar nuna murna da cikan shekaru 39 da samun nasarar juyin juya halin Musulunci a kasar Iran a birnin Isfahan a yau Lahadi: Manjo Janar Yahaya Rahim Safawi mai bada shawara kan harkokin tsaro ga Jagoran juyin juya halin Musulunci na Iran Ayatullahi Sayyid Ali Khamene'i ya bayyana cewa: Zanga-zangar al'ummar Iran a wannan rana ta 22 ga watan Bahman wato 11 ga watan Fabrairun shekara ta 2018 wani babban sako ne ga makiya Iran da ke fayyace cewa: Makirce-makircen da suke kitsawa kan Iran ba zasu cimma nasara ba.

Janar Yahaya Safawi ya kara da cewa: Karfin Iran, ikon ne na Allah, don haka Amurka da haramtacciyar kasar Isra'ila sun gaza su kawar da wannan karfi da ikon. Kamar yadda cikin karfi da ikon Allah, Iran ta hana Amurka cimma munanan manufofinta a yankin gabas ta tsakiya musamman makircin Amurka na kokarin daidaita kasashen Siriya da Iraki domin maida su kananan kasashe marassa ikon dogaro da kai.  

Feb 11, 2018 19:14 UTC
Ra'ayi