•  Gasar Olympics : Samsung Ya Nemi Afuwar Iran

Kamfanin Samsung mallakar Koriya ta Kudu ya nemi afuwa ga Iran, akan kin baiwa 'yan wasan kasar dake halartar gasar Olympics ta hunturu wayar komai da ruwanka ta musaman da akayi saboda wasannin.

Tun da farko dai Kamfanin na Samsung ya ce ba zai baiwa 'yan wasan Iran da Koriya ta Arewa wayar ba, saboda suna karkashin takunkumin kasa da kasa.

Batun da ya janwo takaddama sosai tsakanin kasashen bangarorin, inda harma ma'aikatar harkokin wajen Iran ta kirayi jakadan Koriya ta Kudu dake nan Tehran don bayyana masa bacin ran kasar.

Kamfanin Samsung dai ya ce umurnin ba daga gare sa ba ne, daga hukumar tsara wasannin na Olympics ne, (CIO).

Daga bisani kamfanin na Samsung ya amince baiwa 'yan wasan wayoyin, tare da neman afuwa, amma duk da hakan 'yan wasan na Jamhuriya Musulinci ta Iran sun ki zuwa karbar wayoyin, har sai hukumar CIO ta nemi afuwarsu.

'Yan wasan Koriya ta Arewa ma dai sun dau mataki makamancin wannan bayan da kamfanin ya amunce basu wayar, amma su maida ta kafin su bar kasar. 

Mahukuntan Iran dai sun ce zasu dauki mataki kan kamfanin na Samsung, a yayinda tuni wasu 'yan kasar suka fitar da wani shafi na neman kauracewa duk kayayakin Samsung din.

 

Tags

Feb 09, 2018 15:21 UTC
Ra'ayi