• John Kerry Ya Mayar Wa Netanyahu Da Martani Kan Yarjejeniyar Shirin Nukiliya Na Iran

Tsohon sakataren harkokin wajen Amurka John Kerry, ya mayar wa firayi ministan Haramtacciyar kasar Isra'ila Benjamin Netanyahu da martani kan batun yarjejeniyar shirin Iran na nukiliya.

Kamfanin dillancin labaran IRNA ya habarta cewa, John Kerry ya mayar da martanin ne a lokacin da yake gabatar da jawabi a gaban babban taron kasa da kasa kan harkokin tsaro a birnin Munich na kasar Jamus a jiya, bayan kalaman da Netanyahu ya yi a wurin da ke da'awar cewa, Iran tana hankoron kera makaman nukiliya, tare da yin kira da a yi watsi da yarjejeniyar da aka cimmawa tare da Iran kan shirin nata.

John Kerry ya ce dukkanin ikirarin Netanyahu kan shirin Iran na nukiliya ba gaskiya ba ne, domin kuwa yarjejeniyar da aka cimmawa tare da Iran ba daka aka shirya ta ba.

Shi ma a nasa bangaren tsohon shugaban hukumar makamshin nukiliya ta kasar Amurka Arnest Mones a lokacin da yake gabatar da nasa jawabin a wurin taron a jiya, ya bayyana cewa babu yarjejeniya kan shirin Iran na nukiliya take da wani nakasu balanta a gyara ta.

Feb 19, 2018 06:31 UTC
Ra'ayi