Apr 24, 2019 15:33 Asia/Kabul
  • ننګرهار کښې د ناامنیو له امله څلور سوه کورنۍ بې ځایه شوې دي

خواوشاه څلور سوه کورنۍ دننګرهار په شیرزادو ولسوالۍ کې د داعش او طالب وسله والو تر منځ د روانو نښتو له امله خپلو کورونو پریښودو ته اړ شوې دي.

له جلال آباده زمونږ خبریال رپورټ راکړی چې د ننګرهار د کډوالو چارو رییس قاري نجیب ا... قیومي وایی له تیرو درې ورځو راهیسې چې د دې ولایت د شیرزادو په ولسوالۍ کې د داعش او طالب وسله والو ترمنځ وسله والو نښتو زور اخیستې  تر دا مهاله خواوشاه څلور سوه کورنۍ له خپلو کورونو راوتلې دي. 

هغه وویل چې د دې کورنیو ډیره برخه د چمتلې په دښته او خواوشاه سیمو کښې ځای پر ځای شوې دي.

ها خوا د ننګرهار د والي ویاند عطا ا... خوګیاڼی وایي، په ټولنیزو چاروکې د ننګرهار د مرستیال والي په مشرۍ د اضطرار کمیټې ناسته کړې او د شیرزادو او خوګیانیو ولسوالیو څخه د بې ځایه شویو کورنیو لپاره یې د مرستو پر ور رسولو غور کړی دی.

بل لورته په ختیځو ولایتونو کښې د ۲۰۱ سیلاب قول اردو ویاند محمد هارون یوسفزی وایي، په تیرو څلرویشتو ساعتونوکښې د شیرزادو په ولسوالۍ کې د داعش او طالب تر منځ په روانو نښتو کې پنځه تنه وسله وال طالبان وژل شوي او څلور تنه نور د داعش ډلې له لورې ژوندي نیول شوي دي. هارون یوسفزي وویل: په ځینو سیمو کښې داعش وسله والو پرمختګ کړی او طالب وسله وال یې شاتګ ته اړ کړي دي .

افغان امنیتي ځواکونو تر اوسه د دواړوښکیلو ډلو تر منځ مداخله نه ده کړې . طالبانو او داعش دواړو ډلو تر اوسه د دوې تر منځ د روانې نښتی او زیانونو په اړه رسنیو ته څه نه دي ویلي.

 

ټیګونه

کمنټونه