می 15, 2019 11:27 Asia/Kabul
  • ځلانده یون-۳۰

د ایران د اسلامي انقلاب څلویښت کاله پوره شوي او د ځلانده یون د پروګرامونو په دې لړۍ کښې مونږ د انقلاب د بریالیتوب په دې څلویښتو کلونو کښې د ایران د اسلامي جمهوریت د بریاؤ او لاسته راوړنو جاج اخلو.

                په ایران کښې د اسلامي انقلاب بریا په یو لرغوني شاته پاتې والي د بطلان کرښه راکښله او د حاکمیت بنیاد یې د خلکو په راې او نظر باندې د حقیقي تکیې په مدار کښې د نظام او حرکت په رامینځته کولو کښیښود.

په دې بنیاد د ایران اساسي قانون چې ډیر مترقي او ولسي کلیت لري، په دې لنډه موده کښې برابر شو او د ټولپوښتنې له لارې تصویب شو او اسلامي شورا جوړه شوه او قانوني ارګانونه د ولسواکۍ په چوکاټ کښې، د دیني ارزښتونو په اساس رامینځته شول او کار یې پيل کړ.

د ۱۳۵۷ کال د سلواغې په دوویشتمه نیټه د انقلاب له بریالیتوب وروسته د نوي نظام ترټولو مهمه او وړومبنۍ هڅه د یو داسې حکومت جوړول وو چې له یوې خوا په کښې د ډیموکراټیکو اصولو او معیارونو خیال وساتل شي او د استبداد همیشنۍ خطر له ایرانه وغړیږي او له بلې خوا د ایران د ولس حقیقي او د زړه غوښتنه چې همهغه د اسلامي احکامو پرځاې کیدل او اجرا کیدل دي، عملي شي. له دې امله د ایران د اسلامي انقلاب ترټولو ستره او مهمه بریا د اسلامي جمهوري نظام پلي کیدل دي چې د (دیني ولسواکۍ) د نظام په چوکاټ کښې راڅرګنده شوه. دا حالت د ایران د اسلامي جمهوریت په اساسي قانون کښې له ورایه لیدی شو. د اسلامي ایران اساسي قانون د حاکمیت دوه معنې د یو بل ترڅنګ راوستې دي. د اساسي قانون په وړومبي اصل کښې راغلي دي چې د ایران د حکومت ډول (جمهوري اسلامي) دی او دا په دې معنا ده چې د حکومت شکل (جمهوري) او محتوا یې (اسلامي) ده او په نتیجه کښې یې روا والی د (مکتب) او (د خلکو د انتخاب) په دوو اصولو ولاړ دی. په دیني ولسواکۍ کښې د اسلام مکتب او دیني تعلیمات د ټولنیز فکر او کړچار بنیاد ګرځي. د مثال په توګه د انتخاباتو په بحث کښې فردي او ټولنیز اصول په اساسي قانون کښې د لیکل شویو حقوقو مطابق د ټینګار او خیال ساتنې وړ ګرځیدلي دي.

په جمهوري اسلامي نظام کښې په انتخاباتو کښې د خلکو ګډون او د خپل برخلیک ټاکل، حقیقي دي او خلک د مسئولیت له احساسه د رامینځته شوې دندې په اساس د انتخاباتو په ډګرونو کښې حاضریږي او په دې وجه یې لویدیځې لیبرال ډیموکراسۍ د ګډون کونکو د فیصدۍ له نظره سیالي نه شي کولی او د پرتلې وړ یې نه دي.

د اسلامي انقلاب معظم رهبر حضرت آیت ا... العظمی سید علي خامنه اي په دې هکله فرمايي: زه ټولو ته سپارښتنه کوم چې په دې صحیح لارې روان شي. خیال ساتۍ چې په داسې حال کښې چې مونږ اسلامي دنیا وحدت او یووالي ته رابولو، دښمن ونه کړی شي خپله د جمهوري اسلامي په صفونو کښې اختلاف او تفرقه واچوي. د بریالیتوبونو شرط دا دی چې په اسلامي جمهوریت کښې مختلف اړخونه د یو بل احترام وساتي او یوځاې ووسي. په جمهوري اسلامي کښې انتخاب، د اصلح او سم کس دی نه انتخاباتي سیالي. دا جګړې او سیالۍ په لویدیځې ډیموکراسۍ پورې اړه لري چې له خدای تعالی او دین څخه بیخي بې خبره دي. کوم کارونه چې ځیني کسان کوي، له جمهوري اسلامي سره نه ښايي، دلته اصلح کس غوره کیږي.

معظم رهبر هم داشان فرمايي: دا څه چې نن سبا یې پرې په دنیا کښې د ډیموکراسۍ او ولسواکۍ نوم ایښی دی، هم هغه پخوانی ډیکټاټورۍ دي چې نوې جامه یې اغوستې ده، یعنې د ډلو ډیکټاټوري. که سیالي وي هم، نو د ډلو ترمینځ سیالي ده او د خلکو په کښې هیڅ نه چلیږي. یوه ډله قدرت ته رسیږي او د هغه سیاسي قدرت په سیوري کښې چې د هیواد د چارو ټولې واګې یې په لاس کښې ورکوي او له دغه قدرته په ناوړې استفادې سره ټوله پانګه او پیسې په خپله ګټه راغونډوي او هغه یو ځل بیا د قدرت ترلاسه کولو په لاره کښې لګوي. د دنیا ننۍ ډیموکراسۍ د دروغو او غولونکو تبلیغاتو او په سترګو او زړونو د جادو کولو په بنیاد ولاړې دي. نن سبا چې په دنیا کښې په هر ځاې کښې د ډیموکراسۍ شعار پورته کیږي، تاسو وګورئ چې د ولسمشرۍ یا د پارلیمان د کاندیدانو د تبلیغاتو لپاره کوم کارونه کوي. بې دریغه پيسې لګوي. ډیموکراسي د پيسو د اقتدار په منګولو کښې اسیره ده.

د جمهوي اسلامي نظام لوړ سمبول د (دیني ولسواکۍ) په نوم یوه بې سارې نمونه ده. د دیني ولسواکۍ په بیلګې کښې د لویدیځ د عوام غولونکو نسخو په اپوټه، د خلکو راې په حقیقي معنا اغیز شیندونکې او ټاکونکې ده. په دنیا کښې داسې هیڅ انقلاب نشته چې له بریالیتوبه یې ۵۰ ورځې وروسته په کښې انتخابات ترسره شي. خو دا کار په ایران کښې وشه او خلک د ۱۳۵۸ لمریز کال په وړومبیو ورځو کښې یعنې د انقلاب له کامیابۍ کابو پنځوس ورځې وروسته د سیاسي نظام د ټاکلو لپاره د راې ورکونې مرکزونو ته لاړل او په ټوله دنیا کښې له ترسره شویو انتخاباتو زیاتې پریکنده راې یې په ایران کښې د جمهوري اسلامي نظام ټینګښت ته ورکړې.

د ایران په اسلامي جمهوریت کښې په تیرو څلویښتو کلونو کښې په اوسط توګه هر کال یو وارې انتخابات شوې ي او د هیواد ټول چارواکي او مسئولان د خلکو په نیغ په نیغه یا غیرمستقیمو رایو سره غوره کیږي. د اسلامي انقلاب معظم رهبر د ایران د اوسني ولسمشر حسن روحاني د لوړې په مراسمو کښې په یوه وینا کښې وفرمایل: د هیواد نوي او ځوان نسل له انقلابه مخکښې پړاؤ نه دی لیدلی خو په حکومت کښې د خلکو رول لوبونه هغه ستره بریا ده چې بزرګواره امام وتوانیده د ولس د سمندر په څپانده کولو سره د کلونو او پیړیو باچاهي او وراثتي حکومت او د پردیو لاسوهنه او سلطه ختمه کړي او د هیواد او ولس د خوځښت لوری بدل کړي.

دوي په هم دغه وینا کښې په دې ټکي باندې په ټینګار سره چې خلک او چارواکي باید د (دیني ولسواکۍ او د هیواد په چارو او د مسئولانو په غوره کولو کښې د خلکو په رول لوبونې) ویاړ وکړي، وویل:  کوم مسئولان چې په نوي پړاؤ کښې په کار بوختیږي، د هغو مختلفو مسئولانو د څلویښت کلن زیار او نوښت میراث داره دي چې داسې ډیرې علمي، عملي او فکري بیخ بیناوې یې رامینځته کړې چې له انقلابه مخکښې بیخي نه وې.

                د ایران ولس په تیرو څلورو لسیزو کښې د نړیوال نظام له چیلنجونو په تیریدو سره، د امریکې له خوا له تپل شویو کړکیچونو سره سره د داخلي ثبات او استحکام په لور خپل خوځښت ته دوام ورکړی دی. د ډیموکراټیک نظام جوړونې په ډګر کښې د جمهوري اسلامي نظام د بریاؤ دا بهیر د ایران د سیمه ایز نفوذ او قدرت د زیاتیدو سبب شوی دی.

د بهرني سیاست د چارو کارپوه ډاکټر سید رضا صدر الحسیني د سیمې د هیوادونو په پرتله د ډیموکراټیک نظام جوړونې د دې سطحې د تاثیر ګذار والي په هکله باوري دی چې، په تیرو څلویښتو کلونو کښې د امریکې او د هغې د انډیوالانو د قهر او عصبانیت یوه اصلي وجه دا وه چې په ایران کښې د ولسمشر، د پارلیمان د استازو او د رهبرۍ د خبره ګانو شورا د غړو په شمول د نظام ټول ارکان په ټاکلې قانوني نیټه د خلکو په رایو غوره شوي چې دا کار د نورو هیوادونو د خبرتیا او په عین حال کښې یې د غصې او حسادت سبب شوی دی.

په هم دې وجه له ایران سره دښمنۍ له پخوا لا جدي شوې او د ایران خلاف کارړنګونې زیاتې شوې دي.

*/*/*/*/*/*/*/*/*/*/*/*/*/*

 

ټیګونه

کمنټونه