• Dunia yasubiri kuhukumiwa wahusika wa jinai za Sabra na Shatila

Harakati ya Mapambano ya Kiislamu ya Palestina (Hamas) imetaka kuhukumiwa wale wote waliohusika na mauaji ya Sabra na Shatila huko Lebanon.

Tarehe 16 Septemba inasadifiana na siku ya kukumbuka kutimia miaka 36 tangu kutekelezwa jinai za kutisha mwaka 1982 katika kambi za wakimbizi wa Kipalestina huko Sabra na Shatila nchini Lebanon. Tarehe 16 Septemba mwaka 1982 jeshi la utawala wa Kizayuni ambalo lilikuwa limeukalia kwa mabavu mji mku wa Lebanon, Beirut lilifanya mauaji ya umwagaji damu mkubwa na ya kinyama zaidi kuwahi kushuhudiwa katika karne ya ishirini katika kambi mbili za wakimbizi wa Kipalestina za Sabra na Shatila. Mauaji hayo dhidi ya raia wa Kipalestina wa kambi za Sabra na Shatila yalitekelezwa kwa siku tatu  yaani tarehe 16, 17 na 18 Sptemba. 

Jinai hiyo ambayo ilitekelezwa chini ya uongozi wa Ariel Sharon, Waziri Mkuu wa zamani wa utawala haramu wa Israel ilipelekea kuuliwa shahidi wakazi wa kambi mbili hizo zaidi ya elfu tatu. Ariel Sharon aliongoza mauaji hayo ya kikatili akishirikiana na Rafael Eitan mkuu wa majeshi ya utawala huo wakati huo. Katika mauaji hayo ya umati na yaliyo dhidi ya binadamu, Sharon alikuwa akiliunga mkono tawi la kijeshi la chama cha Kataeb cha huko Lebanon (chama cha Mafalanja); ambapo miongoni mwa viongozi wake kulikuwa na majina kama ya Samir Jaajaa mmoja wa viongozi wa mrengo wa hivi sasa wa Machi 14 wa Lebanon.

Sehemu ya mauaji ya Sabra na Shatila

Nukta ya kuzingatiwa hapa ni kwamba jinai hiyo kama zilivyo jinai nyingine za utawala huo katili, ilitekelezwa kwa uungaji mkono wa Marekani. Kuhusiana na suala hilo, gazeti la New York Times mwaka 2012 lilifichua nyaraka ambazo zilithibitisha wazi kwamba Marekani ilihusika moja kwa moja katika jinai hiyo ya kutisha. Kwa mujibu wa nyaraka hizo, tarehe 17 Septemba 1982 sambasamba na wakati wa kutekelezwa jinai hiyo, Ariel Sharon alikutana na Morris Draper, mjumbe wa wakati huo wa Marekani katika Mashariki ya Kati na kupanga naye jinsi ya kutekelezwa mauaji hayo. Baada ya mauaji hayo, kamati ya kimataifa ya uchunguzi iliyowajumuisha wanasheria mashuhuri wa kimataifa ilibuniwa ambapo ilitoa ripoti na ikiyataja mauaji hayo kuwa jinai ya kivita na kutaka wale wote waliohusika nayo wachukuliwe hatua za kisheria. Kwa upande wake Umoja wa Mataifa tarehe 16 Disemba 1982 ulipasisha azimio ukilaani vikali mauaji hayo ya Sabra ba Shatila. Mwaka uliofuata wa 1983 kamisheni maalumu iliyosimamiwa na Seán MacBride, mwenyekiti wa wakati huo wa Baraza Kuu la Umoja wa Mataifa ilisema kuwa Israel ndiyo iliyokuwa muhusika mkuu wa mauaji hayo kwa sababu ndiyo iliyokuwa ikisimamia na kudhibiti kambi hizo za wakimbizi wa Kipalestina. Pamoja na hayo, na licha ya kuwepo malalamiko mengi ya kimataifa kuhusu jinai hiyo ya Israel lakini hakuna hatua zozote zilizochukuliwa na mashirika ya kimataifa na nchi za Magharibi zinazodai kutetea haki za binadamu kuhusu jambo hilo.

Ariel Sharon, muhusika mkuu wa jinai ya Sabra na Shatila

Baada ya kupita miaka kadhaa tokea kutekelezwa jinai hiyo na pia baada ya Ariel Sharon kuchaguliwa kuwa waziri mkuu wa Israel, familia za wahanga wa mauaji ya Sabra na Shatila hatimaye waliushtaki mahakamani utawala huo haramu kwa msingi wa sheria ya mauaji ya umati iliyopasishwa mwaka 1993 kuhusiana na mauaji ya kimbari ya Rwanda. Tarehe 12 Februari mwaka 2003 pia Mahakama Kuu ya Ubelgiji ilitoa hukumu ya kufuatiliwa kisheria Ariel Sharon ambaye katika kipindi hicho alikuwa amechaguliwa kuwa Waziri Mkuu wa Israel, hukumu ambayo ilitajwa na utawala huo kuwa ya kisiasa. Hata hivyo tarehe 24 Septemba mwaka huohuo, mahakama hiyo iliwekwa chini ya mashinikizo makubwa ya lobi za Kizayuni na washirika wao na mwishowe kulazimika kufanyika mabadiliko kwenye hukumu hiyo ambapo ufuatiliwaji huo kisheria wa Sharon ulifutiliwa mbali. Hukumu hiyo ilifutiliwa mbali kwa kisingizio kwamba washtaki hawakuwa raia wa Ubelgiji wakati wa kutokea jinai hiyo. Hivyo utawala haramu wa Israel haujafikishwa mahakamani kuhusiana na jinai hiyo dhidi ya binadamu, jambo ambalo limewakasirisha sana Wapalestina na fikra za waliowengi duniani ambao wanasisitiza kwamba jinai hiyo ya Israel inapaswa kushughulikiwa ipaswavyo ili wahanga wake wapate kutimiziwa haki.

Tags

Sep 17, 2018 07:28 UTC
Maoni