• Waafghani wawasilisha mafaili milioni 1.4 ya jinai za kivita ICC

Shirika moja la kutetea haki za binadamu limesema Mahakama ya Kimataifa ya Jinai ICC imepokea mafaili milioni moja na laki saba ya jinai za kivita kutoka kwa wananchi wa Afghanistan, ndani ya muda wa miezi mitatu.

Abdul Wadood Pedram, afisa wa shirika hilo linaloojita Human Rights and Eradication of Violence amesema ICC imepokea mrundiko huo wa taarifa kutoka raia wa Afghanistan wanaotaka kutendewa haki, kutokana na jinai za kivita walizofanyiwa wao wenyewe, au jamaa zao wa karibu.

Pedram amesema mfumo wa sheria nchini Afghanistan umeshindwa kuwapa haki raia hao na ndiposa wamekimbilia ICC, na kwamba watuhumiwa wakuu wa jinai hizo ni Marekani na kundi la kigaidi la Taliban.

November mwaka jana, Mwendesha Mashtaka Mkuu wa ICC, Fatou Bensouda alitoa mwito wa kuanzishwa uchunguzi kuhusu jinai za kivita nchini Afghanistan, jambo ambalo lilipingwa vikali na Wizara ya Ulinzi ya Marekani (Pentagon), kupitia msemaji wake Eric Pahon.

Askari wa Marekani katika mashamba ya mihadarati nchini Afghanistan

Hivi karibuni, Mkuu wa Baraza la Utekelezaji la Serikali ya Umoja wa Kitaifa nchini Afghanistan, Abdullah Abdullah aliwataka askari wa kigeni wanaoongozwa na Marekani waondoke nchini humo, akisisitiza kwamba raia wa Afghanistan wanapinga uwepo wa askari wa kigeni nchini mwao.

Hadi sasa karibu askari elfu 14 wa kigeni wakiwemo elfu 11 kutoka Marekani wapo nchini Afghanistan. US iliivamia Afghanistan Oktoba mwaka 2001 kwa kisingizio cha kupambana na ugaidi, wiki chache baada ya shambulizi la Septemba 11.

Tags

Feb 16, 2018 14:11 UTC
Maoni