Mar 26, 2019 07:37 UTC
  • Facebook, You Tube zashtakiwa kwa kurusha mubashara mauaji ya Waislamu New Zealand

Baraza la Waislamu nchini Ufaransa (CFCM) limeifungulia mashitaka mitandao ya kijamii ya Facebook na You Tube kwa kurusha hewani mubashara mauaji ya kutisha ya Waislamu nchini New Zealand.

Abdallah Zekri, Rais wa kitengo cha kufuatilia vitendo vya chuki dhidi ya Uislamu na Waislamu cha baraza hilo amesema kitendo cha mashirika hayo ya mitandao ya kijamii kuruhusu kurushwa hewa moja kwa moja ukatili huo ni sawa na kuruhusu kuenezwa vitendo vya kigaidi vinavyokanyaga hadhi na heshima ya mwanadamu.

Ukatili huo ulirushwa hewani mubashara kwa takriban dakika 17 hivi, na kisha ukaenea kama uyoga kwenye mitandao ya kijamii licha ya Facebook kuifuta video hiyo baadaye.

Anwar Ghani, Msemaji wa Jumuiya ya Waislamu New Zealand (FIANZ) amekaribisha hatua hiyo ya kufunguliwa mashitaka mitandao hiyo ya kijamii kwa kuruhusu kurushwa hewani moja kwa moja mauaji hayo.

Taharuki katika moja ya misikiti iliyoshambuliwa New Zealand

Amesema, "Walifeli, huyu (gaidi) ni mtu aliyetaka umaarufu na hadhira, na alichagua mitandao yenu kama jukwaa la kujitangaza na kueneza uhaini wake."

Itakumbukwa kuwa, katika shambulizi la kigaidi la Ijumaa ya Machi 15 katika misikiti ya Linwood na al-Noor mjini Christchurch, watu 52 waliuawa shahidi na wengine 47 kujeruhiwa. Aliyefanya unyama huo ni Brenton Tarrant, gaidi mwenye chuki na Uislamu raia wa Australia, ambaye aliandika kwenye manifesto yake kuwa yeye ni mfuasi wa Rais Donald Trump wa Marekani.

 

  

Tags

Maoni