سرطان 22, 1401 16:30 Asia/Kabul
  • نگرانی مقامات تاجیک از ساخت برج های مراقبتی در مرز افغانستان و تاجیکستان
    نگرانی مقامات تاجیک از ساخت برج های مراقبتی در مرز افغانستان و تاجیکستان

مقامات تاجیک از اقدام حکومت موقت طالبان در ساخت برج های مراقبتی در مرز افغانستان و تاجیکستان ابراز نگرانی کرده اند.

به گزارش رادیو دری، خبرگزاری آسیا پلاس نوشته است طالبان و ستیزه جویان تاجیک که به این گروه پیوسته اند، در حال ایجاد پست‌های دیده بانی جدید در مرز با  منطقه خودمختار بدخشان  تاجیکستان هستند.

یک مقام گارد مرزی تاجیکستان  در منطقه مرزی مشترک با افغانستان گفته است که کتیبه گرافیکی که در پای کوه مجاورت دیده بانی نوشته شده، یک تهدید نمادین و پیامی برای ناآرامی است که ستیزه جویان طالبان به تاجیکستان فرستاده اند.

این مقام تاجیک که نخواست نامش فاش شود افزود: روی این کتیبه، نام مهدی ارسلان با فونت بزرگی که به راحتی از خاک تاجیکستان خوانده می شود به صورت نمایشی نوشته شده است و با این کار می خواهند ما را آزار دهند و تحریک کنند.

مهدی ارسلان، نام مستعار «محمد شریف اف» شهروند ۲۷ ساله تاجیکستانی است که طالبان مدیریت مرزهای منطقه مرزی «درووز» را به عهده او گذاشته است.

وی به مدت هشت سال به اتهام تروریسم تحت تعقیب مقامات تاجیکستان بود و مقامات تاجیک می گویند که ارسلان و بیش از ۲۰۰ شهروند دیگر این کشور در صفوف طالبان، گروهی را به نام "طالبان تاجیک" تشکیل داه اند.

مقام گارد مرزی تاجیکستان در ادامه افزود: بسیاری از این شهروندان تاجیک که به صفوف طالبان پیوسته اند تحت تعقیب پلیس هستند و در کنار رودخانه مرزی «پنج» که دو کشور را از هم جدا می کند، به صورت نمایشی قدم می زنند.

او گفت: آنها تقریباً هر روز به این برج دیده بانی جدید می آیند و با بلندگو به گویش تاجیکی با صدای بلند و خودنمایی فریاد می زنند و به مقامات تاجیکستان توهین می کنند.

مقامات تاجیکستانی معتقدند اعطای وظایف رسمی از سوی طالبان به جنگجویان تاجیک در طول مرز، بی اعتمادی به این سازمان شبه نظامی را افزایش می دهد و احساس خطر از جانب افغانستان را القا می کند.

طالبان  اگر چه حضور جنگجویان تاجیک در افغانستان را تایید یا تکذیب نمی کند، اما تاکید می کند که هیچ گروهی از خاک افغانستان برای تهدید تاجیکستان استفاده نخواهد کرد.

ذبیح الله مجاهد سخنگوی طالبان در مصاحبه ای  گفته است که تاجیکستان نباید نگران نوشته گرافیکی روی کوه یا حضور هیچ گروهی در آنجا باشد و می تواند نگرانی های امنیتی خود را به کابل بفرستد.

مجاهد گفت: «ما اجازه نخواهیم داد که افغانستان [از سوی گروه‌ها برای] تهدید کشورهای همسایه استفاده شود».

امنیت مرزهای تاجیکستان با افغانستان؛ محور دیدار مقام‌های تاجیکستان و آمریکا

تاجیکستان با کمک آمریکا مرزهایش را با افغانستان تقویت می‌کند

کلیدواژه