Մայիս 16, 2021 19:51 Asia/Tehran
  • Ադրբեջանի նպատակը ռազմական բախում հրահրելն է ՀՀ տարածքում. Փաշինյան

Ադրբեջանի նպատակը Հայաստանի Հանրապետության տարածքում ռազմական բախում հրահրելն է, խնդիրը մի տեղանքի, մի բլուրի վերաբերյալ չէ: «Արմենպրես»-ի հաղորդմամբ՝ այս մասին ասաց ՀՀ վարչապետի պաշտոնակատար Նիկոլ Փաշինյանն՝ ԱԺ արտահերթ նիստում:

«Մայիսի 12-ի լույս գիշերը Ադրբեջանի զինված ուժերի տարբեր ստորաբաժանումներ ներկայացնող մի շարք խմբեր հատել են ՀՀ սահմանը և փորձել են դիրքավորվել ՀՀ տարածքում: ՀՀ զինված ուժերը մարտավարական կանխարգելիչ գործողություններ են իրականացրել՝ առանց հրազենի կիրառման և կանգնեցրել են ադրբեջանցիներին ՝տարբեր խորությունների վրա»,-հիշեցրեց Փաշինյանը:

Նա խոսեց իրադրության գնահատման մասին: «Մեր գնահատականը եղել է միանշանակ, որ Ադրբեջանի նպատակը ռազմական բախում հրահրելն է ՀՀ տարածքում: Այսինքն՝ սա լոկալ ակցիա չէ՝ մի բլուրի, մի լեռան կամ մի ինչ-որ կոորդինատի վերաբերյալ»,-ասաց վարչապետի պաշտոնակատարն ու հավելեց, որ սա հիմնավորող մի քանի փաստարկներ կան:

Նա նաև հիշեցրեց «Զանգեզուրի միջանցքի» վերաբերյալ Ալիևի հայտարարությունների մասին: Փաշինյանը կարևոր արձանագրում համարեց նաև այն, որ Սև լիճը գտնվում է ՀՀ հարավային հատվածի ամենանեղ հատվածում, որտեղ Հայաստանի արևմտյան և արևելյան սահմանների միջև հեռավորությունն ամենաքիչն է բոլոր տեղանքներից:

«Ահա այս փաստերի արձանագրման բերումով է, որ մենք, վերլուծելով իրավիճակը, որոշում ենք կայացրել գործի դնել ՀՀ անվտանգային համակարգի ռազմաքաղաքական մեխանիզմները»,-ասաց նա;

Մայիսի 12-ից Ադրբեջանի զինված ուժերի զինծառայողների որոշ խմբեր հատել են Հայաստանի պետական սահմանը և Սև լիճը պարփակելուն ուղղված գործողություններ են արել: Հայաստանի զինված ուժերը մարտավարական բնույթի հակագործողություններ են իրականացրել:Հարակից որոշ տարածքներում դիրքավորված ադրբեջանցիները հայկական զինուժի մարտավարական հակագործողությունների արդյունքում հեռացել են զբաղեցրած բնագծերից: Ոչ Հայաստանի, ոչ Ադրբեջանի զինուժի ներկայացուցիչների կողմից այս պահի դրությամբ հրազենի կամ այլ զինատեսակի կիրառմամբ դեպք չի գրանցվել: Միաժամանակ ադրբեջանական զինուժի շուրջ 250 ներկայացուցիչներ շարունակում են գտնվել ՀՀ պետական սահմաններից ներս՝ Սյունիքի և Գեղարքունիքի մարզերի որոշ հատվածներում:Հայաստանը պաշտոնապես դիմել է ՀԱՊԿ-ին:

Armenpress.am

Հայերեն ռադիոալիքին հետևեք սոցցանցերում

https://www.instagram.com/parstodayarmenian/
https://twitter.com/radio_armenian
https://www.reddit.com/user/armradio/
https://urmedium.com/c/armenianradio