Հուլիս 03, 2022 20:29 Asia/Tehran
  • Թորոսյան․ ԵԱՀԿ Մինսկի խումբն իսկապես կորցրել է իր երբեմնի կենսունակությունը

ԱԺ «Քաղաքացիական պայմանագիր» խմբակցության պատգամավոր Արսեն Թորոսյանը ֆեյսբուքյան իր էջում կարծիք է հայտնել, որ ԵԱՀԿ Մինսկի խումբն իսկապես կորցրել է իր երբեմնի կենսունակությունը՝ նաև աշխարհաքաղաքական փոփոխություններով պայմանավորված։

Նա նաև գրել է, որ «եթե մեզ էլի շարունակեցին ներարկել, որ անհնար է համակեցության նորմերի շուրջ պայմանավորվել մեր երկու հարևանների հետ, ապա մենք միշտ մնալու ենք այս տեղապտույտի մեջ»։

«Ֆրանսիացի և ամերիկացի համանախագահները պարզապես չեն կարողանում խոսել ռուսաստանցի համանախագահի հետ ՝ Ռուսաստանի կամ հակառակ կողմի չուզելու պատճառով։

Եվ ինձ համար մի փոքր տարօրինակ է այդ ֆորմատին անընդմեջ հղում կատարելը։ Դրանով մենք փաստացի երկխոսությունը մղում ենք փակուղի, ինչը մեր շահերից չի բխում։ Մենք հիմա չենք կարող մեզ այդպիսի շռայլություն թույլ տալ։ Մենք պետք է կարողանանք սպառնացող մարտահրավերներին դիմակայելու լուծումներ գտնել, ոչ թե հակառակը՝ այդ լուծումները հետաձգել»,-գրել է նա։

Նա նաև կարծիք է հայտնել, որ «որպես ազգ, ժողովուրդ և պետություն մեզ անվերջ ներարկել են, որ մենք չենք կարող և իրավունք էլ չունենք խաղաղության մեջ ապրելու մեր հարևանների հետ»։

«Թե՛ տարբեր օրակարգեր ունեցող ներքին ուժեր, թե՛ տարբեր պետություններ մեզ անվերջ ասել են՝ «դուք ինքնուրույն չեք կարող ձեր հարևանների հետ ձեր հարցերը լուծել, անպայման պիտի մենք ներկա լինենք»։

Կարծում եմ, որ մենք պետք է կոտրենք այդ կարծրատիպը և հասկանանք, որ կարող ենք քայլեր ձեռնարկել մեր հարևանների հետ խաղաղ ապրելու ուղղությամբ։ Մենք հիմա լրիվ հակառակ կարծրատիպով ենք ապրում, որ անհնար է ապրել թուրքի, ադրբեջանցու հետ։

Եթե այդ կարծրատիպը հավաքական կարողանանք կոտրել, կարող ենք նստել սեղանի շուրջ և կոմպրոմիսային լուծումներ գտնել։ Եթե չկարողացանք ու մեզ էլի շարունակեցին հավերժ ներարկել, որ անհնար է որևէ համակեցության նորմերի շուրջ պայմանավորվել մեր երկու հարևանների հետ՝ հատկապես Ադրբեջանի, ապա մենք միշտ մնալու ենք այս տեղապտույտի մեջ, որը մեզ միշտ նոր աղետներ է բերելու»,-գրել է նա։ ‌

panarmenian.net

 

Պիտակ