Օգոստոս 12, 2022 19:34 Asia/Tehran
  • Կարսը ՀՀ–ի միջոցով հասանելիություն կունենա դեպի Միջին Ասիա. թուրք պատգամավոր

Թուրքիայում իշխող «Արդարություն և զարգացում» կուսակցության (ԱԶԿ-AKP) պատգամավոր Ահմեդ Արսլանն այցելել է Թուրքիա-Հայաստան սահմանին գտնվող Աքյաքայի շրջան, տեղեկանում ենք ermenihaber.am-ից։

Նա հայտարարել է, թե Ղարաբաղյան առաջին պատերազմի պատճառով փակված հայ-թուրքական արևելյան այդ սահմանադուռն արդեն 30 տարի փակուղային վիճակ է ստեղծել Աքյաքա քաղաքի և շրջանի համար։

«Այս փակուղու բացման հնարավորությունը շատ արժեքավոր է տարածաշրջանի ու բնակիչների համար, ինչպես նաև այն առումով, որ Կարսը Հայաստանի միջոցով հասանելիություն ունենա Միջին Ասիա»,–ասել է նա։

Արսլանը տեղեկացրել է, որ տեխնիկական խմբերը երկրների սահմանին` թե՛ Կարսում, թե՛ Իգդիրում, աշխատանքներ են տանում։ Նրա խոսքով` իրենք ակնկալում են, որ Հայաստանը և Ադրբեջանը կհամագործակցեն տրանսպորտային միջանցքների իմաստով, կբացվեն նաև Թուրքիա-Հայաստան տրանսպորտային միջանցքները։

Թուրք պատգամավորը հավելել է, որ երթուղու վրա վերջերս ևս աշխատանքներ են արվել, երկաթգծի հետ կապված որևէ խնդիր չկա։ Ըստ նրա` Հայաստանի կողմի երկաթգիծը ևս ակտիվ վիճակում է, և սպասում են, որ գործընթացները վայրկյան առաջ ավարտվեն։

Հայաստանի ու Թուրքիայի ներկայացուցիչները 4 հանդիպում և 500 հեռախոսազրույց են անցկացրել

Հիշեցնենք, որ ավելի վաղ թուրքական A Haber հեռուստաալիքը հայտարարել է, որ Հայաստանի և Թուրքիայի հատուկ ներկայացուցիչների միջև բանակցությունների հինգերորդ հանդիպումը նախանշված է սեպտեմբերին։

Հեռուստաալիքի աղբյուրը հայտնել է, որ Անկարան դեմ է երրորդ երկրում հայ-թուրքական բանակցությունների անցկացմանը, ուստի հանդիպումը նախատեսվում է Կարսում։

Մինչդեռ Հայաստանի արտգործնախարարության խոսնակ Վահան Հունանյանը Sputnik Արմենիայի հետ զրույցում ասել է, որ ներկայումս Հայաստանի և Թուրքիայի միջև երկխոսության շրջանակում նոր հանդիպման վերաբերյալ պայմանավորվածություն չկա։

armeniasputnik.am

Պիտակ