Jun 28, 2022 05:16 Asia/Kabul
  • طالبان د هیواد په مرکز کښې د علماؤ یوه ستره غونډه جوړوي

د هیواد ډیرو علمای کرامو د طالبانو له مشرتابه څخه د داسې یوې غونډې د جوړولو غوښتنه کوله

له کابله زمونږ خبریال بیګا رپورټ راکړی چې د طالبانو ویاند ذبیح الله مجاهد وايي د هیواد ډیرو علمای کرامو د طالبانو له مشرتابه څخه د داسې یوې غونډې د جوړولو غوښتنه کوله

مشرتابه هم د دوي غوښتنه ومنله چې په نزدې راتلونکي کښې به د علماؤ یوه ستره غونډه جوړه شي.

مجاهد زیاتوي، دا چې غونډه د ولس د هیلو او غوښتنو په اساس جوړیږي نو د هیواد له ټولو ولایتونو او ولسوالیو څخه به ګڼ عالمان او قومي مشران ګډون په کښې کوي.

که څه هم طالبانو د دې غونډې د جوړیدو کره نیټه نه ده ښودلې خو له دې مخکښې د کابل پولي ټکنیک پوهنتون په یوې خبرتیا کښې ویلي وو چې دغه پوهنتون به د لوې جرګې د غونډې لپاره د روانې چنګاښ میاشتې له ۵ نه تر ۱۲ پورې رخصت وي.

د معلوماتو له مخې د غونډې د جوړولو چارې د ملا برادر په مشرۍ کمیشن ته سپارل شوې دي.

طالب مشران وايي چې یوازې د افغانستان ملي ټیلیویژن ته به د دغې غونډې د کوریج اجازه ورکړې شي او نورو خصوصي رسنیو ته د ورننوتلو اجازه نه ورکول کیږي.

 

 

 

ټیګونه