Oct 12, 2019 21:26 Europe/Tirane
  • Haaretz: Politikat anti-iraniane të Netanjahut kanë dështuar

Për të përditshmen izraelite Haaretz, politika e kryeministrit izraelit Benjamin Netanjahu ndaj Iranit ka dështuar.

Dy ngjarje të paparashikuara strategjike shkatërruan politikën e jashtme dhe të mbrojtjes së kryeministrit izraelit Benjamin Netanjahu, duke treguar se sa katastrofike janë ato. Në artikullin e saj, e përditshmja izraelite Haaretz shkruan: "Ngjarja e parë ishte sulmi i suksesshëm ndaj instalimeve saudite të naftës. Shtetet e Bashkuara nuk morën asnjë veprim në përgjigje të këtij sulmi dhe mbajtën një qasje pasive. Dhe surpriza e dytë ishte braktisja e kurdëve nga Presidenti amerikan Donald Trump, i cili inkurajoi Turqinë të pushtonte një "zonë të sigurt" në rajonin kurd në veri të Sirisë. Dhe kjo e përditshme shton: "Izraeli u befasua nga aftësia operacionale e iranianëve kundër Arabisë Saudite, Netanjahu bëri thirrje për fonde shtesë për të forcuar mbrojtjen kundërajrore, ndërsa Izraeli nuk ishte më pak i befasuar nga tërheqja e SHBA nga veriu i Sirisë ”. Gjithashtu sipas këtij artikulli të shkruar nga Amos Harel dhe Amir Tibon dhe botuar në 7 tetor në Haaretz, herën e fundit që Trump vendosi të tërhiqte forcat e tij nga Siria, Izraeli u informua 24 orë më parë. Këtë herë, Shtëpia e Bardhë nuk ka bërë asnjë përpjekje për ta bërë këtë. Dhe kjo e përditshme izraelite vazhdon: "Netanjahu e ka ndërtuar politikën e tij të jashtme dhe politikën e mbrojtjes në dy baza: identifikimin e plotë të Trump dhe përshkallëzimin e konfliktit me Iranin dhe aleatët e tij, me një seri sulmesh që janë intensifikuar gjatë muajve të fundit, duke goditur caqe të largëta si Iraku. Ai besoi dhe e bëri publikun të besojë se Trump ishte i vëmendshëm ndaj këshillave të tij dhe se ai do të ndërmarrë hapa për të rrëzuar regjimin iranian. Por, për zhgënjimin e tij, Trump ndërpreu kontaktin me të pas zgjedhjeve. Netanjahu nuk ka asnjë aleat tjetër në Shtetet e Bashkuara, pasi ka prishur në mënyrë efektive lidhjet me Partinë Demokratike ". "Fakti që Trump nuk reagoi ndaj sulmit kundër  Arabisë Saudite dhe i braktisi kurdët sirian  është një paralajmërim për Izraelin përfshirë Netanjahun, i cili nuk mund të mbështetet më tek miqtë e tij në Shtëpinë e Bardhë", specifikon Haaretz në artikullin e tij. Dhe ky artikull përfundon: "Trump po përpiqet t'i japë fund pranisë ushtarake amerikane në Lindjen e Mesme. Përpjekjet e Netanjahut për të ndaluar kthesën e SHBA dhe për të penguar shkrirjen e akullit me Iranin janë shkatërruar. Këto janë arsye që na shtyjnë që përfundimisht t’i japim fund mandatit të Netanjahut ".

 

Tags

Komente