Gusht 14, 2020 19:34 Europe/Tirane
  • Turqia paralajmëron Francën dhe Greqinë

Presidenti turk Rexhep Taip Erdogan paralajmëroi të premten Greqinë se Turqia do të hakmerret ndaj çdo sulmi kundër anijes së saj Oruç Reis që eksploron për naftë e gaz në Mesdheun lindor, ku Ankaraja është e përfshirë në një mosmarrëveshje me Athinën në ujërat për të cilat të dyja palët kanë pretendime.

Tensionet janë rritur pas fillimit nga Turqia të operacioneve të kërkimit në fillim të kësaj jave. Erdogan ka paralajmëruar se çdo sulm ndaj anijes eksploruese turke do të paguhet me një “çmim të lartë”. Duke folur para gazetarëve pas lutjeve të së premtes në Stamboll, zoti Erdogan tha se një prej anijeve luftarake që shoqëronte anijen eksploruese Oruç Reis, kishte “marrë përgjigjen e duhur” për një sulm nga një fregatë greke të enjten. “Nëse kjo vazhdon, ata do të marrin përgjigjen e merituar,” tha Presidenti turk. Anija turke Oruç Reis është duke lëvizur midis Qipros dhe ishullit grek të Kretës, nën vëzhgimin e një numri fregatash greke. Të mërkurën njëra prej tyre, përplasi pjesën e përparme me kiçin e një anijeje shoqëruese turke. Një burim grek i mbrojtjes e përshkroi ngjarjen si “aksident”. Ndërkohë, Franca i bëri thirrje BE-së të vendosë sanksione ndaj Turqisë dhe dje mbajti ushtrime detare në ujërat greke me forcat greke. Përmes ushtrimeve të përbashkëta ushtarake greko-franceze, presidenti Macron e bëri të qartë për herë të parë se vendi i tij dëshiron të forcojë praninë e tij në Mesdheun Lindor. Por Erdogan tha se një vend që nuk ka as një bregdet në Mesdheun Lindor po e shtyn Greqinë të ndërmarrë “lëvizje të gabuara” në rajon. “Askush nuk duhet të mendojë shumë lart për veten e tyre. Për të qenë plotësisht i qartë: mos u lodhni kot!”, tha udhëheqësi turk, duke iu referuar Macron-it.

 

Tags

Komente