Apr 09, 2020 11:26 UTC
  • Waliothibitishwa kuambukizwa Corona Afrika wapindukia 10,000

Watu wengine 535 wamethibitishwa kuambukizwa virusi vya corona barani Afrika na kuifanya idadi ya watu wenye ugonjwa wa COVID-19 katika nchi 52 za bara hilo kufikia 10,692.

Hayo ni kwa mujibu wa taarifa ya Kituo cha Kudhibiti na Kuzuia Magonjwa cha Afrika (Africa CDC) ambayo pia imethibitishwa na Shirika la Afya Duniani (WHO).

Misri ilikuwa nchi ya kwanza ya Afrika kuripoti kesi za ugonjwa wa COVID-19 mwezi Februari na tokea wakati huo ugonjwa huo umeenea kwa kasi katika wiki za hivi karibuni.

Katika taarifa, Matshidiso Moeti, mkurugenzi wa WHO barani Afrika amesema ugonjwa wa COVID-19 si tu kuwa unaweza kusababisha vifo vya maelfu ya watu bali pia unaweza kusababisha janga la kiuchumi na kijamii. Ametahadharisha kuwa iwapo ugonjwa wa corona utaenea nje ya miji barani Afrika basi itakuwa changamoto kubwa kwa bara hilo.

Wafanyakazi wa maabara wakichunguza vipimo vya corona katika Maabara ya Shirika la Lance, Nairobi Kenya, Aprili 5

Moeti amesema kuna haja ya kuziwezesha jamii mashinani kwa kuzingatia mazingira ya kila eneo. Aidha amesema WHO inafanya kazi kwa pamoja na serikali za Afrika ili kuimarisha kiwango cha upimaji, karantini, kuwafuatilia wale waliokutana na walioambukizwa, kuzuia maambukizi zaidi na kujumuisha jamii katika kuzuia kuena ugonjwa huo.

 

 

Tags

Maoni