Dec 28, 2020 08:10 UTC
  • Misri yaahidi kufungua tena ubalozi wake nchini Libya

Serikali ya Misri imetangaza kuwa, karibuni hivi itafungua tena ubalozi wake katika nchi jirani ya Libya.

Mohammed al Qablawi. Msemaji wa Serikali ya Mwafaka wa Kitaifa ya Libya amethibitisha habari hiyo baada ya kufanya mazungumzo na ujumbe wa Misri uliotembelea Libya na kuongeza kuwa, Cairo imeahidi kwamba karibuni tu hivi ubalozi wa Misri utafunguliwa mjini Tripoli.

Akihojiwa na mtandao wa habari wa Arabi 21, Mohammed al Qablawi amesema, lengo la ziara ya ujumbe huo wa Misri nchini Libya ni kuanzisha tena uhusiano wa kidiplomasia baina ya nchi mbili.

Mapigano katika mji mkuu wa Libya, Tripoli

 

Jumapili ya wiki iliyopita, ujumbe mmoja wa ngazi za juu wa Misri ulitembelea Libya - ikiwa ni mara kwa kwanza tangu mwaka 2014 - na kuonana na viongozi wa Serikali ya Mwafaka wa Kitaifa ya Libya. Itakumbukwa kuwa, katika vita vya ndani vya Libya, muda wote huu Misri ilikuwa ikimuunga mkono jenerali muasi Khalifa Haftar aliyekuwa anaendesha vita vya kuipindua Serikali ya Mwafaka wa Kitaifa ya Libya inayotambuliwa rasmi kimataifa.

Tangu mwaka 2011 wakati wa kampeni za kumpindua kiongozi wa zamani wa Libya, Muammar Gaddafi hadi hivi sasa, nchi hiyo ya Kiarabu ya kaskazini mwa Afrika haijawahi kuwa na utulivu. Hivi sasa kuna serikali mbili zinazotawala nchini humo.

Mbali na Misri, jenerali muasi Khalifa Haftar anaungwa mkokno pia na nchi kama Saudi Arabia, Imarati na baadhi ya nchi za Magharibi ikiwemo Ufaransa.

Tags