Sep 17, 2019 03:15 UTC
  • Iran: Rais Rouhani hana mpango wowote wa kukutana na Trump

Msemaji wa Wizara ya Mambo ya Nje ya Jamhuri ya Kiislamu ya Iran amepuuzilia mbali uwezekano wowote wa Rais Hassan Rouhani kukutana na Rais wa Marekani Donald Trump katika mkutano ujao wa Baraza Kuu la Umoja wa Mataifa mjini New York.

Abbas Mousavi amesema jana Jumatatu mbele ya waandishi wa habari hapa mjini Tehran kuwa, "Suala la uwezekano wa mkutano huo halipo katika ajenda ya safari ya Dakta Rouhani, na wala sidhani mkutano wa aina hiyo unaweza kufanyika New York."

Amesisitiza kuwa, Marekani inapaswa kurejea katika makubaliano ya nyuklia ya JCPOA na isitishe ugaidi wake wa kiuchumi dhidi ya taifa la Iran, iwapo inataka ndoto yake ya kufanya mazungumzo na Tehran itimie.

Siku chache zilizopita, Waziri wa Fedha wa Marekani Steven Mnuchin alidai kuwa Rais Donald Trump yuko tayari kukutana na Rais Hassan Rouhani mwishoni mwa mwezi huu bila masharti yoyote, katika mkutano wa Baraza Kuu la UN mjini New York.

Pompeo na Mnuchin walipohutubia waandishi wa habari katika Ikulu ya White House

Kauli hiyo iliungwa mkono na Mike Pompeo, Waziri wa Mambo ya Nje wa Marekani ambaye pia alikuwa katika mkutano huo na waandishi wa habari katika Ikulu ya White House. Hata hivyo Trump amekinzana na kauli hiyo ya maafisa wa ngazi za juu wa utawala wake, akisisitiza kuwa madai hayo ni taarifa bandia.

Vyombo vya habari vya Marekani vimeripoti kuwa, Trump ana hamu ya kukutana na Rais Rouhani, na mvutano juu ya suala hilo ulichangia pakubwa yeye (Trump) kumpiga kalamu nyekundu Mshauri wa Usalama wa Taifa wa White House, John Bolton.

Tags

Maoni